Во организација на Меѓународната организација на трудот, во Хотел Арка на 13 декември 2018 година се одржа Трипартитна средба на која учествуваа претставници на МОТ, МТСП, ОРМ, БКМ, ССМ, КСС и други заинтересирани страни и која беше посветена на  процена на начинот на утврдување на минималната плата и  беше презентирана нацрт-студија„ Влијанијата од зголемувањето на минималната плата во Македонија во 2017 година.

Слика 1. Претседателот на ССМ, м-р Дарко Димовски со претставниците на ССМ.

На средбата, од Сојузот на синдикатите на Македонија учествуваа Претседателот на ССМ, м-р Дарко Димовски, Раководителот на Одделенијата Слободан Трендафилов и Љубица Дековска самостоен стручен соработник за економско-социјални прашања.

Претседателот Димовски истакна дека со минималната плата од 12.165,00 денари во ноември 2018 година, се покриваат само 37,38% од трошоците пресметани во минималната синдикална кошница, која за месец ноември 2018 година изнесува 32.545,00 денари, а пак доколку работникот ако ја прима просечната плата која е исплатена во државата во септември 2018 година( септември е последен податок од ДЗС) во износ од 24.355,00 денари, со истата ќе може да подмири 74,96% од најнеопходните потреби на неговото четиричлено семејство(32.492,69 денари СМК). За да ја обезбеди вкупната вредност на производите и услугите вклучени во пресметката на кошничката  му недостасуваат 33,41% од 
просечната плата - односно номинален износ од 8.137,00 денари.

Податоците покажуваат дека постои оправдана потреба од зголемување на минималната плата и Сојузот на синдикатите на Македонија во идниот период ќе понуди модел како истата оправдано да расте во рамки кои ќе бидат во интерес на работниците, а нема да предизвикуваат големи финансиски импликации кај  работодавачите.